Yol-nəqliyyat hadisəsi zamanı qarşı tərəfə dəymiş zərərin ödənilməsi üçün 2011-ci ildən sığorta məcburi olub. Hadisə zamanı dəymiş zərərin maksimum beş min manatını sığorta şirkəti qarşılayır.

Bəs bu məbləğ dəyən ziyanı qarşılayırmı?

"Operativ Media"ya açıqlama verən sığorta məsələləri üzrə ekspert Vüsal Bədəlov deyir ki, il yarım əvvəl təsdiqlənən qaydalara görə, avtomobillərin icbari sığortası üçün tələb olunan məbləğ artıb. İstehsal ili çox olan avtomobillər üçün bu rəqəm daha çoxdur. 

"Gələcəkdə avtomobilə dəymiş zərərin orta məbləği 5 min manatı keçərsə, bu məsələyə də aidiyyəti üzrə yenidən baxıla bilər. Hələki təqdim edilən qəzalarda orta statistik rəqəm 1000 manatdır. Buna görə də bu rəqəm artırılmır. Burada hesablama bir parametrə görə olmur. Ümumi qəza sayı və ödənilən məbləğ nisbəti bu rəqəmi deməyə əsas verir".

Avtomobil ustası Dəniz Ağabəyli isə deyir ki, baş verən qəzalarda dəyən ziyan məbləği əksər hallarda min manatdan yuxarıdır.

"Azərbaycan avtomobil bazarı hər il yenilənir. Bazar yeniləndikcə isə sığortadan verilən pul nə sürücünü, nə də ustaları qane edir. Yəni avtoqəza zamanı sığortanın ödədiyi maksimum məbləğ əksər hallarda dəymiş zərəri qarşılamır. İstehsal ili 2014-cü ildən yuxarı olan avtomobillə qəza törədildiyi halda 10-15 min manat xərc lazım olur. Bu da sığorta ilə sürücü arasında mübahisə yaradır ki, mənə 5 min manat verilir amma, avtomobilin 10-15 min manat xərci var. İli nisbətən köhnə avtomobillərdə dəymiş zərər maksimum 3-6 min manat arası olurdusa, yeni avtomobillərdə bu məbləğ 10 min manatı ötür".