Xarici ölkə vətəndaşı hansı halda Azərbaycan vətəndaşlığına qəbul olunur?

Son günlər müxtəlif platformalarda xüsusən münaqişələr davam edən ölkələrin vətəndaşlarının Azərbaycan vətəndaşlığına qəbul edilmədiyinə dair iddialar yayılıb.

Mövzu ilə bağlı Dövlət Miqrasiya Xidmətindən "Operativ Media"nın sorğusuna cavab olaraq bildirilib ki, yayılan məlumatlar həqiqətə uyğun deyil.

"Bildiririk ki, Azərbaycan Respublikasının vətəndaşlığı haqqında qanunun 14-cü maddəsinin 1-ci hissəsinə əsasən ölkə ərazisində son beş il ərzində fasiləsiz olaraq qanuni əsaslarla daimi yaşayan, qanuni gəlir mənbəyi olan, Azərbaycan Konstitusiyasına və qanunlarına riayət olunması barədə öhdəlik götürən, habelə Azərbaycanın dövlət dilini bilməsi haqqında sənəd təqdim edən əcnəbi və vətəndaşlığı olmayan şəxs mənşəyindən, irqi və milli mənsubiyyətindən, cinsindən, təhsilindən, dinə münasibətindən, siyasi və başqa əqidələrindən asılı olmayaraq bu qanuna müvafiq surətdə öz vəsatəti ilə Azərbaycan vətəndaşlığına qəbul edilə bilər".