“Gürcüstanda 10 manata satılan ehtiyat hissəsi Azərbaycanda 40 manata satılır. İşlənmiş ehtiyat hissələri od qiymətinədir”.
Bunu “Operativ Media”ya açıqlamasında avtomobil ustası Dəniz Ağabəyli deyib.
Ustanın sözlərinə görə, Almaniya istehsalı olan avtomobillərin detallarında qiymət fərqi aydın şəkildə hiss edilir. Koreya istehsalı olan dizel mühərrikli avtomobillərin ehtiyat hissələri də heç də ucuz deyil.
“Əvvəllər avtomobillərin təmiri üçün daha çox Gücüstana üz tutardular. Ancaq hazırda bu mümkün olmadığından ehtiyyat hissələrini də buradan almalı olurlar. Ölkəmizə ehtiyat hissələri daha çox Gürcüstan və digər qonşu dövlətlərdən gətirilir. Bu detallar da əsasən mühərrik və ötürücülər qutusuna aid olur. Bu gün mühərriki 1200, 1300 manata alırıqsa, orada bu mühərrik 600, 700 manatadır. Azərbaycanda daşınma xərcini hesablayarıqsa, gedib oradan gətirməyimiz bizə sərf etmir. Bəzi halda da aldadırlar. Məsələn deyirlər ki, kart ataq pulu göndərin biz də sizə ehtiyyat hissəsi göndərək. Pul atırsan, baxırsan gələn ehtiyyat hissəsi xarabdır. Sonradan adamı da tapmaq olmur. İtirən yenə sürücü olur”.
Dəniz Ağabəyli deyir ki, işlənmiş ehtiyat hissələri yenilərə nisbətən keyfiyyətlidir deyə tələbat hər zaman var:
“1990-cı illərdə istehsal olunmuş Almaniya istehsalı avtomobillərin bir çox yeni detalları yoxdur. Sürücü məcburən işlənmiş alır. Yenisini aldıqda isə bir çox hallarda keyfiyyəti özünü doğrultmur. Ona görə də , ustalar da işlənmiş ehtiyat hissələrinə üstünlük verir. Burada sadəcə yerli insanları nəzərə alıb rüsumları azaltmaq lazımdır. İşlənmiş ehtiyat hissələri satanlar deyək ki, Almaniyada 4 avtomobil üçün heç 10 min avro pul ödəmir. Amma, burada o avtomobillərin detallarını bir-bir satırlar. Gəlir çox görünə bilər, amma, daşıma qiymətləri və gömrük rüsumları da az deyil. Ona görə də qiymət yenə baha olur. Gürcü isə ucuz gətirir, az rüsum ödəyir, ucuz da satır”.
