KİV: Finlandiya Rusiya ilə sərhəd keçid məntəqələrini bağlı saxlayacaq

Finlandiya, yəqin ki, Nazirlər Kabinetinin qərarının qüvvədə olduğu son tarix olan 14 apreldən sonra da Rusiya ilə sərhəddəki yol keçid məntəqələrini bağlayacaq. 

"Operativ Media" xəbər verir ki, bu barədə "İlta-Sanomat" qəzeti mənbələrinə istinadən məlumat yayıb.

Nəşr adı açıqlanmayan mənbədən sitat gətirib: "Apreldə şərq sərhədinin tam açılması ehtimalı azdır. Çox güman ki, şərq sərhədi bağlı qalacaq və ya ən yaxşı halda çox məhdud miqyasda açılacaq".

Qeyd edək ki, hazırda Finlandiya Nazirlər Kabinetinin qərarı ilə Rusiya ilə sərhəddəki keçid məntəqələri aprelin 14-dək bağlanıb.

Rusiya Xarici İşlər Nazirliyinin rəsmi nümayəndəsi Mariya Zaxarova daha əvvəl bildirmişdi ki, Finlandiyanın sərhəd keçidlərini bağlamaq qərarı Avropada yeni ayırıcı xətlər yaradır və Moskvanın bu hərəkətlərə cavabı idarələrarası formatda işlənib hazırlanacaq.