Türkiyə XİN rəhbəri Səudiyyə Ərəbistanı və Fransadan olan həmkarları ilə görüşüb - FOTO

Türkiyənin xarici işlər naziri Hakan Fidan Braziliyada Səudiyyə Ərəbistanının xarici işlər naziri Faysal bin Ferhan və Fransanın xarici işlər naziri Stefan Sejourne ilə ayrı-ayrılıqda görüşlər keçirib.

"Operativ Media" xəbər verir ki, görüşlərdə Qəzzada fövqəladə atəşkəs və iki dövlətli həll üçün region ölkələrinin ata biləcəyi addımlar müzakirə edilib.

Hakan Fidan ilk olaraq həmkarına Antalya Diplomatik Forumunda (ADF) keçiriləcək "Qəzza Paneli"nin mühüm bir fürsət təşkil edəcəyini çatdırıb.

Görüş zamanı ikitərəfli iqtisadi əlaqələr və müdafiə sənayesi sahəsində əməkdaşlıq da qiymətləndirilib.

Nazir Fidanın Fransa xarici işlər naziri Sejourne ilə görüşündə isə yüksək səviyyəli səfər təqvimi, regional məsələlər və Türkiyə-Avropa İttifaqı (Aİ) əlaqələri müzakirə edilib.

Qəzzada vəziyyətin daha da pisləşməsinin qarşısını almaq üçün təcili addımların atılmasının vacibliyini vurğulayan Fidan bu məsələdə beynəlxalq ictimaiyyətin birlik içində hərəkət etməsinin vacibliyini qeyd edib.

Ukraynadakı müharibənin bu ölkənin ərazi bütövlüyü və siyasi birliyi çərçivəsində həll edilməsi lazım olduğuna diqqət çəkən Fidan Türkiyənin Aİ-yə üzvlük prosesini digər namizəd ölkələrdən ayrı dəyərləndirməyin strateji səhv olacağını bildirib.