Hollandiya Ukrayna ilə təhlükəsizlik müqaviləsi imzalayacaq

Hollandiya və Ukrayna 10 illik təhlükəsizlik müqaviləsi imzalayacaq.

"Operativ Media" xəbər verir ki, bu barədə Hollandiya Xarici İşlər Nazirliyinin bəyanatında deyilir.

Departament qeyd edib ki, sazişin hazırlanmasına NATO-nun 2023-cü ilin iyulunda Vilnüsdə keçirilən sammitindən sonra başlanılıb. Buraya orta və uzunmüddətli hərbi dəstək, müdafiə sənayesi sahəsində əməkdaşlıq, Ukraynanın kiberhücumlar da daxil olmaqla təhlükəsizlik təhdidlərinə qarşı dayanıqlığının artırılması və Ukrayna ordusu ilə NATO qüvvələri arasında qarşılıqlı fəaliyyətin təkmilləşdirilməsi daxildir.

Sənəd həmçinin bərpa və yenidənqurma, hibrid təhdidlərə qarşı mübarizə, günahkarların məsuliyyətə cəlb edilməsi və Rusiyaya qarşı sanksiyaların gücləndirilməsi kimi sahələri əhatə edir.

Tezliklə rəsmi imzalanma mərasimi keçiriləcək. "Saziş Hollandiya hökumətinin Ukraynaya təhlükəsizlik, yenidənqurma və ədalət sahələrində uzunmüddətli dəstək vermək öhdəliyini nümayiş etdirir", - Hollandiya Xarici İşlər Nazirliyi vurğulayıb.