Xarici universitetlərdən qəbul alan gənclərə "Xaricdə Təhsil Dövlət Proqramı" niyə kömək edə bilmir?

Azərbaycanın 2 savadlı gənci - Qəndab Məmmədova Harvard Universitetindən və qardaşı Mehdi Məmmədov isə Drexel Universitetindən qəbul alıblar. Lakin 51000 dollar pul lazımdır ki, gedib orada təhsil ala bilsinlər. Gənclərin isə bu məbləği toplamağa maddi imkanları uyğun olmadığı üçün xalqdan yardım istəyiblər. 

Bəs Azərbaycanda xarici ölkədə təhsil almaq istəyənlər üçün bu istiqamətdə yararlana biləcəkləri proqram var? "Xaricdə Təhsil Dövlət Proqramı" bu məsələdə hansı tələbələrə kömək edə bilər?

Bu barədə Dövlət Proqramı idarəetmə Qupundan "Operativ Media"nın sorğusuna cavab verilib.

Bildirilib ki, 2024/2025-ci tədris ili üçün “2022-2026 Dövlət Proqramı” çərçivəsində xaricdə bakalavriat və magistratura təhsili üzrə sənəd qəbulu 13 noyabr 2023-cü il tarixində ictimaiyyətə elan edilmiş “2022-2026 Dövlət Proqramı” çərçivəsində dünyanın nüfuzlu universitetlərinin bakalavriat və magistratura səviyyələri üzrə maliyyələşdiriləcək təhsil proqramlarının siyahısı” əsas götürülərək həyata keçirilir. Sözügedən siyahı müvafiq Sərəncamda müəyyən olunmuş 15 prioritet sahə əsas götürülməklə hər il Elm və Təhsil Nazirliyi tərəfindən yenilərək ictimaiyyətə elan edilir. Müvafiq siyahıda yer alan proqramlardan əlavə namizədlərin “universitetlər üzrə top10”da yer alan ali təhsil müəssisələrindən istənilən ixtisas üzrə Dövlət Proqramına müraciət etməsi nəzərdə tutulmuşdur.

Qeyd olunub ki, “Drexel University” müvafiq siyahıda yer almayıb.

Siyahıda yer alan  universitet və proqramlarla https://dp.edu.az/uploads/fileuploads/2023/11/0599d1ea0c724fb7999659e43658329f.pdf adresinə keçid edərək tanış olmaq mümkündür.