Peskov: Rusiya Yaxın Şərqdə gərginliyin artmasından narahatdır

"Moskva Yaxın Şərqdə gərginliyin artmasından son dərəcə narahatdır, bütün ölkələri təmkinli olmağa çağırır və bütün fikir ayrılıqlarının yalnız siyasi və diplomatik üsullarla həll edilməsini müdafiə edir".

"Operativ Media" xəbər verir ki, bunu Rusiya prezidentinin mətbuat katibi Dmitri Peskov bildirib.

İran Silahlı Qüvvələrinin elit bölməsi, İslam İnqilabı Keşikçiləri Korpusu, ayın əvvəlində İranın Suriyadakı konsulluğunun İsrail təyyarələri tərəfindən məhv edilməsinə cavab olaraq aprelin 14-nə keçən gecə İsrailə zərbələr endirib. Müxtəlif mənbələrə görə hücumda bir neçə yüz raket və pilotsuz uçuş aparatı, o cümlədən Şahed kamikadze pilotsuz uçan aparatlar, Fəttah və Fəttah-2 hipersəs raketləri iştirak edib. İranın dövlət televiziya kanalı Press TV bütün hipersəs raketlərinin hədəflərinə çatdığını bildirib.

İsrail ordusunun məlumatına görə, İran 170-ə yaxın pilotsuz təyyarə, 30-dan çox qanadlı raket və 120-dən çox ballistik raket daxil olmaqla ümumilikdə 300-dən çox hərbi sursat və PUA-nı havaya buraxıb. Eyni zamanda, İsrail yalnız “bir neçə raketin” ölkəyə çatdığını və “kiçik ziyana” səbəb olduğunu bildirir.

İran Silahlı Qüvvələrinin Baş Qərargah rəisi Məhəmməd Baqiri Tehranın “Doğru vəd” əməliyyatını başa çatdırdığını və onu davam etdirməyi planlaşdırmadığını, lakin İsrailin hər hansı tədbir görəcəyi təqdirdə İranın növbəti əməliyyatının əvvəlkindən daha geniş olacağını bildirib.

İsrail naziri Benni Qantz bildirib ki, ölkə İran təhlükəsinə qarşı regional koalisiya yaratmaq və hücuma lazımi vaxtda və lazımi şəkildə cavab vermək niyyətindədir. İsrail hökumətinin yaxın gələcəkdə növbəti addımlar barədə qərar verəcəyi gözlənilir.