Cənubi Koreya və Ukrayna arasında 2,1 milyard dollarlıq kreditlər üzrə çərçivə sazişi imzalanıb

Koreya Respublikası və Ukraynanın maliyyə nazirləri Çoi Sanq Mok və Sergey Marçenko aprelin 19-da Vaşinqtonda Kiyevə 2,1 milyard dollarlıq güzəştli uzunmüddətli kreditlərin verilməsi ilə bağlı çərçivə sazişi imzalayıblar.

"Operativ Media" xəbər verir ki, bu barədə Koreyanın Planlaşdırma və Maliyyə Nazirliyi məlumat yayıb. 

"Xüsusən, İqtisadi İnkişaf və Əməkdaşlıq Fondu vasitəsilə mövcud çərçivə sazişinin bağlanması ilə 2,1 milyard ABŞ dolları məbləğində orta və uzunmüddətli kreditlərin verilməsi üçün hüquqi əsaslar yaradılıb. Ukraynanın bərpasına və inkişafına kömək edə biləcək layihələr dəstəklənib", - deyə məlumat verilib.

Vəsaitlərin ayrılacağı İqtisadi İnkişaf və Əməkdaşlıq Fondu Koreya Respublikası tərəfindən 1987-ci ildə yaradılıb.

Çoi Sanq Mok xatırladıb ki, Koreya Respublikasının prezidenti Yun Seok Yeol 2023-cü ilin sentyabrında Kiyevə 2,3 milyard dollar ayrılacağını elan edib. Bu vəsaitin 200 milyon dolları bu il humanitar yardıma yönəldiləcək. Cənubi Koreyanın maliyyə naziri Ukrayna ilə iqtisadi əməkdaşlığın gücləndirilməsinə ümid etdiyini bildirib və Koreya Respublikası şirkətlərinin Şərqi Avropanın bu ölkəsinin bərpasında fəal iştirak edə bilməsi üçün yardım istəyib.

Koreya Respublikası humanitar və maliyyə yardımı göstərib və Ukraynaya silahla deyil, mina detektorları kimi öldürücü olmayan hərbi təyinatlı əşyalar verib.