Azərbaycanla Mərakeş arasında viza rejimi ləğv edilib - YENİLƏNİB

 

Azərbaycan Respublikasının xarici işlər naziri Ceyhun Bayramov Qambiya Respublikasına işgüzar səfəri çərçivəsində Mərakeş Krallığının xarici işlər, Afrika ilə əməkdaşlıq və xaricdəki mərakeşlilər naziri Nasser Bourita ilə görüşüb.

Bu barədə "Operativ Media"ya Azərbaycan Xarici İşlər Nazirliyindən bildirilib.

Görüş zamanı Azərbaycan Respublikası və Mərakeş Krallığı arasında ikitərəfli münasibətlərin müxtəlif aspektləri ətrafında fikir mübadiləsi aparılıb.

İki ölkə arasında mövcud əməkdaşlıq gündəliyindən bəhs edən nazir Ceyhun Bayramov, Azərbaycan və Mərakeş arasında ticarət, enerji, təhsil və parlamentlərarası əlaqələr və digər sahələrdə əməkdaşlığın geniş inkişaf potensialının mövcudluğunu qeyd edib.

C.Bayramov, həmçinin BMT, İslam Əməkdaşlıq Təşkilatı (İƏT) və Qoşulmama Hərəkatı (QH) kimi çoxtərəfli platformalarda həyata keçirilən təmasların və bu platformalarda ölkələrin bir-birinin mövqeyinə göstərdiyi qarşılıqlı dəstəyin ikitərəfli münasibətlər üçün mühüm rol oynadığını qeyd edib.

Görüş zamanı nazirlər iki ölkə arasında ümumvətəndaş passportları sahibləri üçün viza rejiminin aradan qaldırılması barədə sazişi imzalayıblar.

***

20:57
 

Xarici işlər naziri Ceyhun Bayramov Qambiyaya səfəri çərçivəsində mərakeşli həmkarı Nasser Bourita ilə görüşüb.

XİN-dən "Operativ Media"ya verilən məlumata görə, nazirlər Azərbaycan ilə Mərakeş arasında əməkdaşlığın perspektiv istiqamətləri, o cümlədən bərpa olunan enerji mənbələri və ticarət sahəsində ətraflı fikir mübadiləsi aparıblar. Tərəflər bölgədəki son hadisələri də müzakirə ediblər.

Nazirlər Azərbaycan və Mərakeş arasında viza rejiminin ləğvi haqqında saziş imzalayıblar.