Bayden dörd ölkənin liderilə Yaxın Şərqdəki vəziyyəti müzakirə edib

ABŞ prezidenti Co Bayden Böyük Britaniyanın Baş naziri Kir Starmer , Almaniya kansleri Olaf Şolts, İtaliyanın Baş naziri Corca Meloni və Fransa lideri Emmanuel Makron ilə Yaxın Şərqdəki vəziyyəti müzakirə edib, tərəflər İranı İsrailə hücum etməməyə çağırıb.

"Operativ Media" xəbər verir ki, bu barədə Ağ Evin Milli Təhlükəsizlik Şurasının strateji kommunikasiyalar üzrə koordinatoru Con Kirbi brifinqdə bildirib.

“Düşünürəm ki, siz artıq israilli həmkarlarımızın təhlükələri ilə bağlı bəyanatlarını görmüsünüz - onlar İranın və ya onun tərəfdarlarının, bəlkə də, yaxın günlərdə hücumunun getdikcə daha çox olacağını düşünürlər. Mən sizə deyərdim ki, biz bu narahatlıqları bölüşürük və buna görə də israilli və regiondakı digər həmkarlarımızla daimi əlaqə saxlayırıq.

Buna görə də prezident Bayden bu səhər Böyük Britaniya, Fransa, Almaniya və İtaliyadan olan həmkarları ilə danışıb. Bu söhbət, əsasən, Yaxın Şərqdəki gərginliyi müzakirə etmək üçün baş tutub, bütün liderlər İsrailin müdafiəsini və atəşkəs zərurətini təkrarlamaq baxımından əvvəllər dediklərini təkrarlayıblar”, - deyə Con Kirbi bildirib.

Tərəflər gərginliyin azaldılması, atəşkəs və Qəzza zolağında girovların azad edilməsi ilə bağlı razılığın əldə edilməsi istiqamətində davam edən səyləri müzakirə ediblər. Ağ Ev rəsmisinin sözlərinə görə, Vaşinqton administrasiyası Yaxın Şərqdəki vəziyyəti və orada artan gərginliyi diqqətlə izləyir.