Finlandiyada ehtiyatda olan hərbçilərin yaş həddi artırılacaq

Finlandiya Müdafiə Nazirliyi ehtiyatda olan hərbçilərin yaş həddinin 65 yaşa qədər artırılmasını nəzərdə tutan qanun layihəsinin hazırlanmasına başlayıb.

"Operativ Media" xəbər verir ki, bu barədə Qazeta.ru məlumat yayıb.

“Müdafiə Nazirliyi ehtiyatda qalma yaş həddinin artırılması ilə bağlı hökumətə təklif hazırlamağa başlayıb. Məqsəd 2025-ci ilin yazında parlamentə təklif təqdim etməkdir”, - deyə nazirliyin məlumatında bildirilir.

Hazırda ehtiyatda olan zabitlər üçün maksimum yaş həddi 60, sıravilər üçün isə 50 yaş təşkil edir. Nazirlik qanun layihəsinin hansı kateqoriyadan olan hərbi qulluqçulara aid ediləcəyini hələ açıqlamayıb.

Respublikanın müdafiə naziri Antti Hakkänen qeyd edib ki, ehtiyatda olan hərbçilər özləri yaş həddinin artırılmasını tələb ediblər.

Bununla yanaşı, Müdafiə Nazirliyi hərbsizləşdirilmiş Aland adalarından qadınlar və kişilər arasında hərbi xidmət üçün könüllülərin sayını artırmaq məqsədilə yeni təşəbbüsləri də nəzərdən keçirir.