500 manatlıq əsginaslar 44 günlük Vətən müharibəsində Azərbaycan Ordusunun zəfəri münasibəti ilə Azərbaycan Mərkəzi Bankı tərəfindən 04 noyabr 2021-ci il tarixində tədavülə buraxılıb.
"Operativ Media" xəbər verir ki, Azərbaycan Mərkəzi Bankı tərəfindən daha əvvəl mediaya verilmiş məlumata əsasən, 500 manatlıq xatirə pul nişanı məhdud sayda (1 mln. ədəd) istehsal olunub və onun istehsal limitinin artırılması nəzərdə tutulmur.
Bu pul nişanları digər dövriyyə pulları kimi ölkə ərazisində nominal dəyəri ilə qanuni ödəniş vasitəsidir. “Azərbaycan Respublikasının Mərkəzi Bankı haqqında Qanunu”nun 33.6-cı bəndinə əsasən Mərkəzi Bankın buraxdığı pul nişanları, o cümlədən yubiley və xatirə pul nişanları Azərbaycan Respublikasının bütün ərazisində nominal dəyərləri ilə hər növ ödənişlərin həyata keçirilməsi, hesablara daxil edilməsi və pul köçürmələri zamanı hökmən qəbul edilir.
Lakin, "eManat", "MilliÖn" kimi ödəmə terminalları 500 manatlıq əsginasları qəbul etmir. Belə ki, terminallar dövriyyədə olan 1, 5, 10, 20, 50, 100 və 200 AZN-lik əsginasları qəbul edir.
Məsələ ilə bağlı "eManat"ın marketinq üzrə mütəxəssisi Ayşən Həsənova ilə əlaqə saxladıq. Onun sözlərinə görə, buna əsas səbəb 500 manatlıq əsginasların məhdud sayda buraxılmış olması və müştərilərin bu əsginaslara tələbinin az olmasıdır.
"Pasha Pay" İctimaiyyətlə əlaqələr şöbəsinin eksperti Ayla Qasımova da bunun həmin əsginasların məhdud sayda olması və tələbatın az olması ilə əlaqəli olduğunu bildirdi. Həmçinin o qeyd etdi ki, terminalların sistemlərinə yeni əsginasların əlavə edilməsi sadə proses deyil.
Nərmin Qocamanova
