Tramp: HƏMAS ABŞ-nin Qəzza zolağının nizamlanması planını qəbul etməlidir

Fələstinin HƏMAS hərəkatı ABŞ hökumətinin Qəzza zolağında münaqişənin həlli planı ilə razılaşmalı, əks halda ağır nəticələrlə üzləşəcək.

Operativ Media xəbər verir ki, bunu ABŞ prezidenti Donald Tramp Silahlı Qüvvələrin ali komandirləri qarşısında çıxışı zamanı bildirib.

Amerika lideri Pentaqon katibi Pit Heqsetin təşkil etdiyi generallarla görüşdə “HƏMAS razılaşmalıdır, əks halda işlər onlar üçün çox çətin olacaq” deyib. Hadisə Virciniya ştatının Quantiko şəhərində yerləşən ABŞ Dəniz Piyadaları bazasında baş verib.

Tramp əlavə edib ki, onun təklif etdiyi plan Yaxın Şərqdə “3000 ildir” həll olunmayan münaqişəyə son qoya bilər.

Ağ Ev bundan əvvəl Qəzza zolağında münaqişənin həlli planını dərc edib. Sənəddə hərbi əməliyyatların tamamilə dayandırılması, HƏMAS-ın əlində olan girovların 72 saat ərzində azad olunması, həmçinin Qəzza zolağının keçid dövründə xarici idarəetməyə verilməsi nəzərdə tutulur. Anklav sakinlərinə isə sərbəst şəkildə gedib-qayıtmaq imkanı yaradılacaq.