Meksika millisində sərt qərar: Toplanışa qatılmayan futbolçular DÇ-2026-dan kənarda qalacaq
Meksika Futbol Federasiyası yerli çempionatda çıxış edən oyunçulara xəbərdarlıq edib ki, təlim-məşq toplanışına qatılmayıb öz klublarında qalan futbolçular 2026-cı il dünya çempionatının final mərhələsi üçün milli komandanın heyətindən kənarlaşdırılacaqlar.
Operativ Media xəbər verir ki, bu barədə BBC məlumat yayıb.
Mayın 6-da başlayan toplanış FİFA-nın müəyyən etdiyi beynəlxalq pəncərədən kənarda keçirilir və Meksika çempionatının pley-off mərhələsi, həmçinin KONKAKAF Çempionlar Kubokunun oyunları ilə eyni vaxta təsadüf edir. Oyunçuların düşərgəyə gəlməsi üçün yerli vaxtla saat 20:00-a qədər son müddət təyin olunub. Ötən həftə federasiya baş məşqçi Xavyer Agirrenin Mexiko şəhərindəki toplanış üçün seçdiyi 20 futbolçunun adını açıqlayıb. Onlardan 12-sinin dünya çempionatının yekun heyətində yeri artıq zəmanətlidir.
Federasiyanın bəyanatında deyilir: “Məşqçilər korpusunun göstərişinə əsasən, bugünkü təlim-məşq toplanışında iştirak etməyən istənilən oyunçu dünya çempionatının heyətindən kənarlaşdırılacaq”.
Bu yay turnirin ABŞ və Kanada ilə birlikdə təşkilatçılarından biri olan Meksika yekun heyətini iyunun 1-də elan edəcək. Komanda mayın 22-də Qana, mayın 31-də Avstraliya və iyunun 4-də Serbiya ilə yoldaşlıq oyunları keçirəcək. Daha sonra, iyunun 11-də “Atsdeka” stadionunda Cənubi Afrika ilə matçla qrup mərhələsinə başlayacaq.
Baş məşqçi Agirre mətbuat konfransında bildirib: “Bildiyiniz kimi, bəyanat tamamilə aydındır: gəlməyən şəxs dünya çempionatından kənarda qalacaq. Biz güzəştə gedə bilmərik, qətiyyən. Heç kim razılaşmanı pozmayıb. İndiyə qədər pley-off oyunları milli komandanın oyunçuları olmadan keçirilirdi. Hamımız imzaladığımız, müzakirə etdiyimiz və gördüyümüz şərtlərlə razıyıq — bizi qeyd-şərtsiz dəstəkləyirlər. Mən bura izah etməyə gəlmişəm ki, bu, unikal bir layihədir və biz buna sadiqik. Qeyri-adi heç nə baş verməyib, hər şey plan üzrə gedir. Azarkeşlərin, oyunçuların, rəhbərliyin və mətbuatın böyük dəstəyi var. Hamımız eyni gəmidəyik və bunu sizə deməyin vacib olduğunu düşünürəm”.
Yaranmış vəziyyətlə əlaqədar “Toluka” klubu hücumçu Aleksis Veqa və müdafiəçi Xesus Qalyardonu milli komandaya buraxmaq məcburiyyətində qalıb. Mayın 7-də komanda KONKAKAF Çempionlar Kubokunun yarımfinalının cavab oyununda “Los-Anceles”i qəbul edib (ilk oyun 1:2, cavab oyunu 4:0).
