"Mundo Deportivo": Reşford "Aston Villa"ya qayıda bilər
"Aston Villa" "Mançester Yunayted"in hücumçusu Markus Reşfordu heyətinə qatmaq niyyətindədir.
Operativ Media xəbər verir ki, bu barədə "Mundo Deportivo" nəşri məlumat yayıb.
Mənbənin bildirdiyinə görə, 28 yaşlı ingilis futbolçunun La Liqa çempionu "Barselona" ilə olan icarə müqaviləsinə iyunun 15-nə qədər aktivləşdirilməli olan 30 milyon avroluq birdəfəlik satınalma bəndi daxildir. Həm klubun, həm də oyunçunun tamdəyərli müqavilə imzalamaqda maraqlı olmasına baxmayaraq, maliyyə məsələləri vəziyyəti qəlizləşdirir.
Əgər "Mançester Yunayted" öz qiymət şərtlərində israr edərsə, bu vəziyyətdən daha əvvəl də Reşfordla maraqlanan "Aston Villa" qazanclı çıxa bilər. Hücumçu 2025-ci ilin fevralından iyununa qədər məhz bu komandada icarə əsasında çıxış edib.
Reşford 2025-ci ilin iyul ayından "Barselona"da oynayır. O, keçirdiyi 48 matçda 14 qol vurub və 14 məhsuldar ötürmə ilə yadda qalıb.
"Transfermarkt" portalı futbolçunun transfer dəyərini 40 milyon avro olaraq qiymətləndirir.
