FİFA prezidenti Canni Infantino 2026-cı il dünya çempionatının bütün oyunlarında su fasilələrinin tətbiq edilməsinin səbəbini açıqlayıb.

Operativ Media xəbər verir ki, o, su fasilələrinin başlıca səbəbini isti ilə əlaqələndirib.

​"Başlıca səbəb istidir, lakin biz onu da anlamalıyıq ki, 39 gün davam edən dünya çempionatı kimi bir turnirdə komandalar bu müddət ərzində potensial olaraq səkkiz oyun keçirə bilərlər. Buna görə də bir az dincəlmək imkanı olduqca vacibdir.

Bizim üçün hər oyunda bütün komandaların eyni şəraitdə olmasını təmin etmək daha da önəmlidir. Sırf bir oyunda havanın daha isti olması, temperaturun bir qədər aşağı olduğu digər oyunda isə belə bir imkanın tapılmaması səbəbindən məşqçinin oyuna təsir etmək və dəyişikliklər etmək fürsəti qazanması vəziyyətini qəbul etmək çətindir. Biz hər kəs üçün bərabər şərait yaratmaq istəyirik, buna görə də bu fasilələr hər bir matçda tətbiq olunub.

​Bu fasilələr FİFA-ya əlavə gəlir gətirmir, çünki bütün kommersiya müqavilələri əvvəlcədən imzalanıb. Bu səbəbdən bizim üçün bu, maliyyə məsələsi deyil. Bizim üçün bu, sırf idman məsələsidir.

​Oyunçular matçın son saniyələrinə qədər hücum edir və aktiv şəkildə mübarizəni davam etdirirlər. Ola bilsin ki – bəlkə də yox – bu, həm də futbolçuların əldə etdiyi həmin kiçik fasilə sayəsində baş verir, bundan sonra onlar meydana qayıdıb bacardıqlarını nümayiş etdirə bilirlər", – deyə Infantino bildirib.

​Fasilələr oyunların 22-ci və 67-ci dəqiqələrində elan olunur və hər biri üç dəqiqə davam edir. Bu vaxt hər hissənin sonunda əsas vaxta kompensasiya olunan dəqiqələr kimi əlavə edilir. Belə bir prosedur dünya çempionatları tarixində ilk dəfədir tətbiq olunur.