Meksika Prezidenti Klaudiya Şeynbaum bildirib ki, hökumət 2029-cu il klublararası dünya çempionatının keçirilməsinə dəstək barədə qərar verməzdən əvvəl 2026-cı il dünya çempionatının iqtisadiyyata və turizmə göstərdiyi təsiri qiymətləndirəcək.

Operativ Media xəbər verir ki, bu təşəbbüs rəsmi olaraq Meksika Futbol Federasiyası tərəfindən irəli sürülüb.

​Şeynbaumun sözlərinə görə, istənilən qərar şərtlərin ölkə üçün nə dərəcədə əlverişli olmasından asılı olacaq. Prezident qeyd edib: "Biz hər zaman Meksika üçün faydalı şərtlər axtarmalıyıq. Bu, ümumilikdə ölkə üçün yaxşı olardı, lakin konkret vəziyyətə baxmaq lazımdır".

​Yaxın vaxtlarda Turizm Nazirliyi 2026-cı il dünya çempionatının turist axınına və iqtisadiyyata təsiri barədə hesabat təqdim edəcək. Hökumət növbəti turnirin keçirilməsi üçün irəli sürülən sifarişi dəstəkləyib-dəstəkləməyəcəyini məhz bu məlumatlar əsasında müəyyənləşdirəcək.

​2026-cı il dünya çempionatı ərəfəsində aparılan modernləşdirmə işləri sayəsində ölkə FİFA-nın ciddi tələblərinə cavab verən dünya səviyyəli infrastruktura – VAR sisteminə, müasir rabitə vasitələrinə və inkişaf etmiş mehmanxana şəbəkəsinə malikdir. İlkin mərhələdə beş stadion nəzərdən keçirilir: final oyununun keçirilməsinə əsas namizəd hesab olunan və Mexikoda yerləşən 80 mindən çox tamaşaçı tutumlu "Atsteka" stadionu; artıq dünya çempionatında iş təcrübəsi olan Monterreydəki "BBVA" və Qvadalaxaradakı "Akron" stadionları; həmçinin Monterreydəki "Universitario" və Mexikodakı Olimpiya stadionları. Son iki stadion mümkün alternativlər sayılsa da, onlarda kiçik əməliyyat təkmilləşdirmələrinin aparılması tələb oluna bilər.

​Bu arada, 2029-cu il klublararası dünya çempionatına ev sahibliyi etməyə Braziliya, Qətər və ABŞ kimi ölkələr də artıq maraq göstəriblər. Bundan əlavə, İspaniya və Mərakeş tərəfindən birgə sifariş formalaşdırılır.