Dieqo Maradonanın 1986-cı il dünya çempionatındakı kapitanlıq sarğısı hərracda satılıb

Argentina milli komandasının sabiq futbolçusu Dieqo Maradonanın 1986-cı ildə təşkil olunmuş dünya çempionatında istifadə etdiyi kapitanlıq sarğısı "Sotheby's" hərrac evində 512 min dollara özünə yeni sahib tapıb.

​Operativ Media xəbər verir ki, bu barədə məlumatı hərrac evinin mətbuat xidməti yayıb.

​Məlumata görə, əfsanəvi futbolçu bu sarğı ilə xüsusilə İngiltərə yığmasına qarşı keçirilən 1/4 final mərhələsinin matçında meydana çıxıb. Həmin qarşılaşmada Argentina rəqibini 2:1 hesabı ilə üstələyib və hər iki qolun müəllifi məhz D.Maradona olub. Onun bu oyunda əllə rəqib qapısına vurduğu qol sonradan futbol tarixinə "Tanrının əli" adı ilə daxil olub.

​Qeyd edək ki, bundan əvvəl üçqat dünya çempionu Pelenin 1958-ci il dünya çempionatının final oyununda geyindiyi oyun forması hərracda təxminən 5 milyon dollara satılmışdı.