UEFA klub turnirlərində 3-cü təsnifat mərhələsinin püşkü atılacaq
Bu gün UEFA-nın Çempionlar Liqası, Avropa Liqası və Konfrans Liqasında 3-cü təsnifat mərhələsinin püşkatma mərasimi keçiriləcək.
Operativ Media xəbər verir ki, iyulun 20-də baş tutacaq tədbirdə qeyd olunan turnirlərdə növbəti mərhələnin cütlükləri müəyyənləşəcək. İsveçrənin Nyon şəhərində təşkil olunacaq mərasimdə qitə kuboklarında mübarizəni davam etdirən Azərbaycan klublarının da potensial rəqibləri bəlli olacaq.
Püşkatma mərasiminin vaxtları da artıq dəqiqləşib. Çempionlar Liqasının tədbiri Bakı vaxtı ilə saat 14:00-da start götürəcək. Daha sonra, saat 15:00-da Avropa Liqasının, saat 16:00-da isə Konfrans Liqasının püşkatma mərasimi başlayacaq.
Qeyd edək ki, turnirlərin 2-ci təsnifat mərhələsində ölkəmizi Çempionlar Liqasında təmsil edən "Sabah" Finlandiyanın "KuPS" kollektivi ilə qarşılaşacaq. Avropa Liqasındakı təmsilçimiz Ağdamın "Qarabağ" komandası isə Bolqarıstanın ÇSKA klubu ilə qüvvəsini sınayacaq.
Konfrans Liqasında mübarizə aparan digər iki klubumuzdan "Zirə" Estoniya "Payde"si ilə, "Neftçi" isə Belarusun "Dinamo" (Minsk) komandası ilə üz-üzə gələcək.
