"Bornmut" Aleks Skott üçün "Çelsi"dən gələn 75 milyon avroluq təklifi rədd edib
İngiltərənin "Bornmut" klubu yarımmüdafiəçisi Aleks Skottun transferi ilə bağlı "Çelsi"dən daxil olan təxminən 75 milyon avroluq təklifi geri çevirib.
Operativ Media xəbər verir ki, BBC-nin yaydığı məlumata görə, "albalılar" komandanın əsas heyət oyunçularından biri olan 22 yaşlı ingilis futbolçunu heyətində saxlamaq niyyətindədir və bu keçidlə bağlı növbəti təkliflərin qəbul edilməyəcəyini qarşı tərəfə bildirib.
Buna baxmayaraq, İngiltərənin U-21 milli komandasının üzvü ən azı iki ay əvvəl klubun təqdim etdiyi yeni müqavilə şərtlərindən imtina etdiyi üçün vəziyyət mürəkkəb olaraq qalır.
Cari transfer pəncərəsində yarımmüdafiəçi ilə "Arsenal", "Mançester Yunayted", "Tottenhem" və "Mançester Siti" də maraqlanıb. İyun ayında "Arsenal"ın da futbolçu üçün etdiyi müraciət "Bornmut" tərəfindən rədd olunmuşdu.
Qeyd edək ki, 2023-cü ilin avqustundan "Bornmut"da çıxış edən A.Skottun klubla mövcud müqaviləsi 2028-ci il iyunun 30-dək nəzərdə tutulub. Yarımmüdafiəçi 2025/2026-cı illər mövsümündə keçirdiyi 39 matçda 4 qol vurub və 1 məhsuldar ötürmə edib. "Transfermarkt" portalı onun transfer dəyərini 50 milyon avro qiymətləndirir.
