Kimpembe karyerasını Qətərdə davam etdirəcək
Fransa millisinin sabiq müdafiəçisi Presnel Kimpembe karyerasını Qətərin ikinci divizionunda mübarizə aparan "Əl-Xaritiyat" klubunda davam etdirməyə yaxındır.
Operativ Media xəbər verir ki, bu barədə "L'Equipe" nəşri məlumat yayıb. Azad agent statusunda olan 30 yaşlı futbolçu son olaraq "Qətər SK" komandasının şərəfini qoruyub.
Fransalı müdafiəçi 2025-ci ilin sentyabrında PSJ-dən ayrılaraq "Qətər SK" klubuna transfer olunmuşdu. O, bu komandanın heyətində keçirdiyi 11 oyunda (5 matçda əvəzlənmədən çıxış edib) məhsuldar göstəricilərlə fərqlənə bilməyib.
Qeyd edək ki, 2023-cü ilin fevralında aşil vətərinin qopması səbəbindən təxminən iki mövsüm yaşıl meydanlardan kənar qalan Kimpembe, Fransa milli komandası ilə 2018-ci ildə dünya çempionu olub və yığmanın heyətində ümumilikdə 28 matçda forma geyinib.
