Şimali Koreya ABŞ-ni nüvə siyasətinə görə ittiham edib

ABŞ-nin həyata keçirdiyi siyasətin beynəlxalq nüvə silahlarının yayılmaması sisteminə xələl gətirdiyi və yeni silahlanma yarışının risklərini artırdığı bildirilib.

Operativ Media xəbər verir ki, bu barədə Koreya Xalq Demokratik Respublikasının (KXDR) Xarici İşlər Nazirliyinin memorandumunda qeyd olunub. Sənəd Koreyanın Mərkəzi Teleqraf Agentliyi (KCNA) tərəfindən yayımlanıb.

Memorandumda ABŞ-nin nüvə silahlarının həm şaquli, həm də üfüqi yayılmasına yönəlmiş fəaliyyətlərinin beynəlxalq nüvə silahlarının yayılmaması rejiminin əsaslarını zəiflətdiyi iddia olunub.

KXDR Xarici İşlər Nazirliyi ABŞ-nin öz nüvə arsenalını genişləndirməsi və modernləşdirməsini “şaquli yayılma” nümunəsi kimi göstərib. Bu çərçivədə LGM-35A Sentinel qitələrarası ballistik raketinin hazırlanması, B-21 strateji bombardmançı təyyarələri, “Columbia” sinifli sualtı qayıqlar və B61 nüvə aviasiya bombalarının yeni modifikasiyaları ilə bağlı işlər qeyd edilib.

Sənəddə həmçinin ABŞ-nin “Golden Dome” raketdən müdafiə sistemini yaratmaq planına diqqət çəkilib.

KXDR Xarici İşlər Nazirliyi “üfüqi yayılma” ilə bağlı ABŞ-ni müttəfiqlərinə nüvə texnologiyaları ötürməkdə, nüvə imkanlarını ölkə hüdudlarından kənarda yerləşdirməkdə və Avropa və Asiyadakı tərəfdaşlarla genişləndirilmiş çəkindirmə mexanizmlərini inkişaf etdirməkdə ittiham edib.

Bu kontekstdə NATO, AUKUS, həmçinin Cənubi Koreya və Yaponiya ilə əməkdaşlıq nümunə kimi göstərilib.

KXDR Xarici İşlər Nazirliyi bildirib ki, Pxenyanın bundan sonrakı siyasəti milli maraqların və regional təhlükəsizliyin qorunması zərurəti əsasında müəyyənləşdiriləcək.

Memorandumda qeyd olunub ki, KXDR-in nüvə silahına malik məsuliyyətli dövlət kimi atacağı addımlar ABŞ-nin nüvə potensialını gücləndirməsi və nüvə silahlarının yayılması ilə bağlı mövcud vəziyyət nəzərə alınmaqla müəyyən ediləcək.