Ölkənin müxtəlif bölgələrində şəkər tozunun limitlə və baha satıldığına dair iddialar yayılıb.
"Operativ Media" bir neçə bölgə üzrə iddiaların həqiqətə uyğun olub-olmadığını araşdırıb.
Vətəndaşlar bildiriblər ki, son 10 gündür iri və xırda marketlərdə şəkər tozunun satışında məhdudiyyət tətbiq edilir.
İqtisadçı ekspert Rəşad Həsənov mövzu ilə bağlı saytımıza bildirib ki, bu vəziyyəti ölkədə şəkərlə bağlı hər hansı çatışmazlıq və ya qıtlıq kimi qiymətləndirmək düzgün deyil. Çünki bu hal müvəqqətidir. Belə ki, yay mövsümündə mürəbbə, cem, kompot kimi müxtəlif məhsulların hazırlanması tələbatı kəskin artırır. Bu isə istehsal həcmini orta tələbə uyğunlaşdıran müəssisələrin tədarük və təchizat zəncirində müəyyən pozulmalara gətirib çıxarır.
“Sadəcə mövsüm dövrü ilə əlaqədar birdən-birə tələbin intensiv şəkildə ortaya çıxması xarakterik olaraq bu istiqamətdə zəncirdə fasilələrin yaranmasına gətirib çıxarır. Müştərilərinə şəkər tozu tələbi qarşısında imtina etməyən müəssisələr də bəzi hallarda müəyyən bir limitlər gətirirlər bunun satışı ilə əlaqədar. Düşünürəm ki, qısa müddətdə bu problem aradan qalxacaqdır, təxminən 1 ay sonra".
Ekspert sözügedən dövr əzində qiymət artımının da ola biləcəyini, amma bu bahalaşmanın stabil və uzunmüddətli olmayacağını deyir.
“Qısamüddətli dövrdə olsa da, müəyyən mənada bəzi ticarət şəbəkələrində pərakəndə ticarət müəssisələrində qiymətlərin artımı müşahidə oluna bilər. Çünki şəkər tozu əksər hallarda ticarət şəbəkələri tərəfindən müştərinin cəlb edilməsi məqsədilə təşviqedici məhsul kateqoriyasına daxil olaraq daha ucuz qiymətə təklif olunur. Belə qıtlıq hallarında bu, ticarət müəssisələrinin qiymətləri daha optimal səviyyəyə və mənfəət normasını artırmağa şərait yaradır.”
Rəşad Həsənov həmçinin qeyd edib ki, ölkənin şəkər tozu ilə bağlı daxili tələbatı 100 faizədək ödənilir.
