NYT: Blinkenin Yaxın Şərqə səfəri ABŞ-nin çıxılmaz vəziyyətdə olduğunu göstərir

"Dünyanın Qəzza zolağında mülki əhalinin ölümündən şoka düşdüyü bir vaxtda ABŞ İsraili dəstəkləmək üçün çətin vəziyyətdədir". 

"Operativ Media" xəbər verir ki, bu barədə "The New York Times" məlumat yayıb.

Nəşr qeyd edib ki, ABŞ dövlət katibi Antoni Blinkenin Yaxın Şərqə səfəri "Fələstinlilərin ölümü ilə bağlı beynəlxalq qəzəblə İsrailə sarsılmaz dəstək arasında qalan ABŞ-nin düşdüyü çətin vəziyyəti" vurğulayır. Getdikcə daha çox ölkə Vaşinqtonu qeyd-şərtsiz atəşkəs elan etməsi üçün İsrailə təzyiq göstərməyə çağırır.

Daha əvvəl "NBC News" mənbələrə istinadən xəbər vermişdi ki, Birləşmiş Ştatlar beynəlxalq ictimaiyyətin Yaxın Şərqdəki münaqişə ilə bağlı mövqeyini tənqid etməsi səbəbindən ölkənin "təcrid oluna biləcəyindən" ehtiyat edir.

CNN-in məlumatına görə, ABŞ prezidenti Co Bayden və müşavirləri özəl olaraq İsrail liderlərinə xəbərdarlıq edirlər ki, Qəzza zolağında mülki əhalininhədəf alınması İsrailin hərbi əməliyyatlarına dəstəyi zəiflədir. 

Qeyd edək ki, Amerika diplomatiyasının rəhbəri Yaxın Şərq və Asiya ölkələrinə turneyə çıxıb. Blinken 2-10 noyabr 2023-cü il tarixlərində Tel-Əviv (İsrail), Əmman (İordaniya), Ankara (Türkiyə), Tokio (Yaponiya), Seul (Koreya Respublikası) və Yeni Dehlidə (Hindistan) səfərdə olacaq.