Tacikistan və İran arasında 19 əməkdaşlıq sənədi imzalanıb

İran prezidenti İbrahim Rəisinin Düşənbəyə səfəri zamanı Tacikistan və İran hökumətləri arasında əməkdaşlığa dair bir sıra sənədlər imzalanıb. 

"Operativ Media" xəbər verir ki, bu barədə Tacikistan lideri Emoməli Rəhmonun mətbuat xidməti məlumat yayıb.

"Ən yüksək səviyyədə keçirilən görüş və danışıqlar nəticəsində Tacikistan və İran arasında 19 yeni sənəd imzalanıb", - məlumatda deyilir.

Görüşdən sonra Rəhmon jurnalistlərə bildirib ki, danışıqlar zamanı İran və Tacikistan liderləri dövlətlərin əməkdaşlığından məmnunluq ifadə ediblər.

"Ölkələrimizin müxtəlif sahələrdə əməkdaşlıq əlaqələrini genişləndirmək, daha da inkişaf etdirmək və möhkəmləndirmək üçün çoxlu imkanlar var. Danışıqlar zamanı nəqliyyat, elm, mədəniyyət, idman, informasiya texnologiyaları sahələrində ikitərəfli əməkdaşlığa dair yeni sənədlər paketi imzalanıb", - mətbuat xidməti qeyd edib. 

Xidmətin məlumatına görə, dövlət başçıları birgə bəyanat imzalayıblar və onların iştirakı ilə viza rejiminin ləğvi ilə bağlı qarşılıqlı anlaşma haqqında, İranın Çabahar limanı vasitəsilə daşımalara dair, xilasetmə və anti-xidmət orqanları arasında əməkdaşlıq haqqında memorandumlar imzalanıb.

Bundan əlavə, Tacikistan və İran arasında 2030-cu ilə qədər əməkdaşlıq proqramının həyata keçirilməsi planı da imzalanıb.