Myanma hökuməti ölkənin parçalanması təhlükəsi barədə xəbərdarlıq edib

Myanma prezidenti vəzifəsini icra edən Myint Şve ölkənin parçalana biləcəyini deyib.

"Operativ Media" xəbər verir ki, bu barədə Deccan Herald məlumat yayıb.

Myanma rəsmiləri deyirlər ki, əgər hökumət Çinlə sərhədə yaxın ərazilərdə hökumət əleyhinə qüvvələrin koalisiyasının irəliləməsinin qarşısını ala bilməsə, ölkə çökə bilər.

KİV-in məlumatına görə, Çinlə həmsərhəd Şan əyalətində iki həftəyə yaxındır döyüşlər gedir. Hücum Arakan Ordusu, Taang Milli Azadlıq Ordusu və Myanma Milli Demokratik Alyans Ordusu tərəfindən həyata keçirilir. Onların nümayəndələri bildiriblər ki, silahlı qruplar Myanma ordusunun onlarla postunu ələ keçirib və Myanma ilə Çin arasında əsas ticarət yollarını kəsiblər.

Ötən həftə sonu Çinin xarici işlər naziri Nun Jun Myanmanın paytaxtı Nay Pyi Tauya səfər edib. Bundan sonra Çinin Xarici İşlər Nazirliyi bəyanat yayaraq Myanma rəsmilərini iki ölkə arasında sərhəd təhlükəsizliyini gücləndirmək üçün əməkdaşlığa çağırıb.

Çin Xarici İşlər Nazirliyi Myanmada münaqişədə iştirak edən tərəfləri müharibəni dayandırmağa və Çinlə sərhəd bölgələrin əhalisinin təhlükəsizliyini, eləcə də Myanmadakı çinli personalın təhlükəsizliyini təhlükəyə atmamağa çağırıb.