ABŞ Tayvana silah tədarükünü davam etdirəcək

ABŞ prezidenti Co Bayden Çərşənbə günü keçirilən iclasda Pekinin etirazlarına baxmayaraq, Vaşinqtonun Tayvana silah tədarükünü davam etdirmək niyyəti barədə Çin prezidenti Si Tsinpinə məlumat verib. 

"Operativ Media" xəbər verir ki, bu barədə jurnalistlər üçün keçirilən növbəti onlayn brifinqdə Ağ Evin Milli Təhlükəsizlik Şurasının strateji kommunikasiyalar üzrə koordinatoru Con Kirbi bildirib.

"Prezident Bayden Tsinpinə çox açıq şəkildə bildirdi ki, biz münaqişə axtarmırıq, biz Tayvan boğazında sülh və sabitlik axtarırıq, bizim istədiyimiz budur, heç bir dəyişiklik olmasın. Biz Tayvanın müstəqilliyini dəstəkləmirik, lakin ABŞ-Tayvan Münasibətləri Aktına uyğun olaraq Tayvana müdafiə imkanları verməyə davam edəcəyik", - Ağ Ev sözçüsü qeyd edib.

Kirbi əlavə edib ki, silah tədarükünün davam etməsi ABŞ-nin Tayvanı özünümüdafiə imkanları ilə təmin etmək istəyi ilə bağlıdır: "Bayden bir daha qeyd etdi ki, biz status-kvonun birtərəfli qaydada, xüsusən də güc yolu ilə dəyişdirilməsini istəmirik".