Ukraynaya Yardım üzrə Əlaqə Qrupu Kiyevə 80 milyard dollardan çox hərbi yardım vəd edib

"Ukraynaya Hərbi Yardım üzrə Təmas Qrupunun Rusiyanın bu ölkədə hərbi əməliyyatı başlayandan sonra Ukrayna tərəfinə vəd etdiyi hərbi yardımın ümumi həcmi artıq 80 milyard dolları keçib".

"Operativ Media" xəbər verir ki, bunu ABŞ-nin müdafiə naziri Lloyd Ostin bəyan edib.

O qeyd edib ki, 50-yə yaxın dövlətin daxil olduğu təmas qrupu hərbi əməliyyatlar başlayandan sonra Ukraynaya 80 milyard dollardan çox hərbi yardım göstərməyi öhdəsinə götürüb. Amerika hərbi idarəsinin rəhbəri bu silahların hansı hissəsinin artıq Kiyevə təhvil verildiyini dəqiqləşdirməyib.

Ostin yaxınlaşan qış fonunda bu ölkələrin Ukraynaya əlavə hava hücumundan müdafiə vasitələri verməsini gözlədiyini də vurğulayıb: "Biz tərəfdaşımızı inadla dəstəkləməklə yanaşı, Ukraynanın ehtiyaclarını necə qarşılamaqda davam edə biləcəyimiz barədə yaradıcı düşünməliyik".

Pentaqon rəhbəri həmçinin iddia edib ki, Birləşmiş Ştatlar hətta İsraili dəstəkləsə də, Ukraynaya aktiv şəkildə kömək etməyə davam edə bilər.