Qırğızıstan prezidenti İsrail-Fələstin münaqişəsində "iki dövlətli həll”ə çağırıb

Qırğızıstan prezidenti Sadir Çaparov Yaxın Şərqdəki vəziyyəti və Qəzzadakı humanitar böhranı dərin narahatlıqla izlədiklərini bildirib və İsrail-Fələstin problemində "iki dövlətli həll"ə çağırıb.

"Operativ Media" xəbər verir ki, bu barədə Çaparov Belarusun paytaxtı Minskdə keçirilən Kollektiv Təhlükəsizlik Müqaviləsi Təşkilatına (KTMT) üzv dövlətlərin Kollektiv Təhlükəsizlik Şurasının növbədənkənar iclasında çıxış edib.

Dünyada geosiyasi vəziyyətin getdikcə mürəkkəb və ziddiyyətli xarakter aldığını bildirən Çaparov İsrail-Fələstin münaqişəsinin "iki dövlət" prinsipi əsasında sülh yolu ilə həllinin tərəfdarı olduqlarını bildirib.

Yaxın Şərqdəki vəziyyəti və Qəzzadakı humanitar böhranı dərin narahatlıqla izlədiklərini ifadə edən Çaparov qeyd edib: "Tərəfləri can itkisi və mülki şəxslərə qarşı zorakılığın qarşısını almaq üçün hərtərəfli tədbirlər görməyə, hərbi əməliyyatları tez bir zamanda dayandırmağa çağırırıq. Mümkün qədər tez danışıqlar prosesinə başlamaq lazımdır" .