Rusiya: ABŞ-nin hərəkətləri Koreya yarımadasında deeskalasiyaya ziddir

"ABŞ və müttəfiqlərinin hərəkətləri, xüsusən də Koreya Xalq Demokratik Respublikasının (KXDR) sərhədləri yaxınlığında birgə hərbi manevrlər Koreya yarımadasında və onun hüdudlarından kənarda gərginliyi azaltmaq niyyətlərinə uyğun gəlmir". 

"Operativ Media" xəbər verir ki, bunu Rusiya Federasiyasının BMT-dəki daimi nümayəndəsinin müavini Anna Evstiqneyeva deyib.

"ABŞ nümayəndə heyəti hər fürsətdə özünü Pxenyan tərəfindən yaradıldığı iddia edilən vəziyyətin qurbanı kimi təqdim etmək üçün Təhlükəsizlik Şurasını çağırır. KXDR sərhədlərinin bilavasitə yaxınlığında həyata keçirilən ABŞ, Yaponiya və Koreya Respublikasının birgə təlimləri gərginliyi daha da artırır. Bu il müttəfiqlər artıq ABŞ hərbçilərinin birbaşa iştirakı ilə altı birgə təlim keçiriblər", - diplomat qeyd edib.

"Bundan əlavə, Cənubi Koreya hökuməti cavab tədbiri olaraq, regionda sabitliyin qorunmasında və silahlı insidentlərin qarşısının alınmasında mühüm rol oynayan 2018-ci il Koreyalararası hərbi sazişi qismən dayandırmaq qərarına gəlib. Bu cür addımlar sabitliyə kömək edə bilməzdi", - Evstiqneyeva əlavə edib.