İran məhkəməsi ABŞ-dən Süleymaninin öldürülməsinə görə 50 milyard dollar tələb edir

Tehranın Baş Məhkəməsi ABŞ hökumətini və 41 fiziki və hüquqi şəxsi İran İslam İnqilabı Keşikçiləri Korpusunun Əl-Qüds xüsusi təyinatlılarının keçmiş komandanı Qasım Süleymanin qətlinə görə 49,77 milyard dollar ödəməyə məcbur edib.

"Operativ Media" xəbər verir ki, bu barədə IRNA məlumat yayıb.

“ABŞ və Birləşmiş Ştatlarda olan digər 41 fiziki və hüquqi şəxs general Qasım Süleymaninin şəhadəti zamanı törədilən cinayətlərə görə 49 milyard və 770 milyon dollar təzminat ödəməlidir"-məhkəmənin hökmündə bildirilir.

Qeyd edək ki, 2020-ci il yanvarın 3-nə keçən gecə ABŞ-ın Bağdad Beynəlxalq Hava Limanı ərazisində keçirdiyi əməliyyat nəticəsində iranlı general, SEPAH xüsusi təyinatlı qüvvələrinin komandanı Qasım Süleymani və İraq şiə milislərinin rəis müavini Əbu Mehdi əl-Mühəndis öldürülüblər. Vaşinqtonda onların 2019-cu il dekabrın 31-də Bağdaddakı Amerika səfirliyinə hücumun təşkilində əli olduğu hesab edilir. Buna cavab olaraq İran İraqdakı Amerika bazalarına, o cümlədən Ayn Əsədə zərbələr endirib.