Çin Ukraynadakı münaqişə tərəflərini sülh üçün səyləri gücləndirməyə çağırıb

"Çin Ukraynadakı münaqişənin bütün tərəflərini praqmatik mövqe tutmağa və sülhə nail olmaq üçün səyləri gücləndirməyə çağırır". 

"Operativ Media" xəbər verir ki, bunu Çin Xalq Respublikasının BMT-dəki daimi nümayəndəsinin müavini Qenq Şuanq dünya təşkilatının Təhlükəsizlik Şurasının iclasında deyib.

"Ukrayna məsələsində Çinin mövqeyi dəyişməz olaraq qalır. Biz həmişə sülh və dialoqun tərəfində olmuşuq və atəşkəsə nail olmaq və münaqişəyə mümkün qədər tez son qoymaq üçün həmişə sülh danışıqlarının təşviqinə sadiq qalmışıq. Biz bütün tərəfləri sakit və praqmatik mövqe tutmağa və döyüşlərin mümkün qədər tez başa çatması üçün sülhə nail olmaq üçün səylərini gücləndirməyə çağırırıq", - diplomat qeyd edib.

Qenq Şuanq vurğulayıb ki, Çin bütün tərəflərlə işləməyə davam edir və böhranın siyasi həllini təşviq etmək üçün səylər göstərir.

"Ukrayna böhranının uzadılması və mürəkkəbləşdirilməsi heç bir tərəfin maraqlarına xidmət etmir və beynəlxalq ictimaiyyət bu böhranın mənfi təsirlərini minimuma endirmək üçün birgə səylər göstərməlidir", - diplomat yekunlaşdırıb.