Oman: Qərbin hökmranlığını dayandırmaq və ədalətli dünya nizamı qurmaq lazımdır

"İndiyə qədər mövcud olan ədalətsiz dünya nizamı dəyişməlidir, biz Qərbin hökmranlığını dayandırmalı və yeni münasibətlər qurmalıyıq". 

"Operativ Media" xəbər verir ki, bunu Oman Sultanlığının vəliəhdi, mədəniyyət, idman və gənclərlə iş üzrə naziri Ziyazin bin Heysəm Əl Səid Rusiya prezidenti Vladimir Putinlə görüşündə deyib.

Rusiya dövlətinin başçısı "Rusiya çağırır!" forumunun plenar iclasında çıxış edərək, Rusiya və dünya iqtisadiyyatındakı mövcud vəziyyətlə bağlı dəyərləndirmələr edib. Bundan sonra Omanlı diplomat qeyd edib: "Çıxışınızı çox diqqətlə dinlədim, təsdiq etmək istərdim ki, hazırkı beynəlxalq vəziyyətə, ilk növbədə, mövcud ədalətsiz dünya nizamına və Qərbin hökmranlığına son qoyulması zərurəti ilə bağlı bütün qiymətləndirmələrinizi bölüşürəm. Yeni ədalətli dünya nizamı, ikili standartlar olmadan iqtisadi əlaqələr qurulmalıdır".

"Mən həm də razıyam ki, bütün dünyada vəziyyətin hazırkı inkişafı heç bir ideologiya tətbiq etmədən, üçüncü ölkələrin təzyiqi olmadan ölkələr arasında ticarət-iqtisadi əlaqələrin qurulması üçün yeni mexanizmlərin yaradılması zərurətini diktə edir", - deyə vəliəhd qeyd edib.