Quterreş: HƏMAS vəhşiliyi bütün fələstinliləri cəzalandırmaq üçün əsas deyil

"HƏMAS hərəkatının vəhşiliyi fələstinlilərin kollektiv cəzalandırılması üçün əsas sayıla bilməz". 

"Operativ Media" xəbər verir ki, bunu BMT-nin baş katibi Antonio Quterreş Yaxın Şərqdəki vəziyyətlə bağlı Təhlükəsizlik Şurasının iclasında deyib.

"HƏMAS-ın törətdiyi vəhşilik Fələstin xalqının kollektiv şəkildə cəzalandırılmasına heç vaxt haqq qazandıra bilməz. HƏMAS-ın İsrailə qarşı fərq qoymadan raket hücumları və mülki əhalidən canlı qalxan kimi istifadə etməsi müharibə qanunlarına zidd olsa da, bu cür davranış İsraili məsuliyyətdən azad etmir. Beynəlxalq humanitar hüquqa mülki şəxsləri qorumaq, mütənasiblik və ehtiyatlılıq prinsiplərinə riayət etmək vəzifəsi daxildir", - Quterreş qeyd edib.

"Beynəlxalq humanitar hüquq seçici şəkildə tətbiq edilə bilməz. O, bütün tərəflər üçün hər zaman eyni dərəcədə məcburidir. Beynəlxalq ictimaiyyət bu sınaqlara son qoymaq üçün mümkün olan hər şeyi etməlidir", - Quterreş yekunlaşdırıb.