İran Xarici İşlər Nazirliyi: Tehran yeni nüvə sazişinin bağlanmasına ehtiyac görmür

İran tərəfi Tehranın nüvə proqramı üzrə yeni Birgə Hərtərəfli Fəaliyyət Planının (JCPOA və ya nüvə sazişi) bağlanmasına ehtiyac görmür.

"Operativ Media" xəbər verir ki, bunu İran Xarici İşlər Nazirliyinin sözçüsü Nasir Kənani həftəlik mətbuat konfransında bildirib.

2015-ci ildə Böyük Britaniya, Almaniya, Çin, Rusiya, ABŞ, Fransa və İran İranın nüvə proqramına məhdudiyyətlər müqabilində sanksiyaların ləğvini nəzərdə tutan Birgə Hərtərəfli Fəaliyyət Planı (JCPOA) adlı nüvə sazişinə imza atıblar. ABŞ 2018-ci ilin mayında JCPOA-dan çıxdı və Tehrana qarşı sanksiyaları bərpa etdi. Buna cavab olaraq İran nüvə tədqiqatları, sentrifuqalar və uranın zənginləşdirilməsi səviyyələrinə qoyulan məhdudiyyətlərdən imtina edərək, saziş üzrə öhdəliklərini mərhələli şəkildə azaldacağını elan edib.