İsrail kəşfiyyatı Danimarkada HƏMAS-la əlaqəli 7 nəfərin həbs edildiyini açıqlayıb

"Danimarka təhlükəsizlik xidmətləri və hüquq-mühafizə orqanları Qəzza zolağına hakim HƏMAS hərəkatı ilə əlaqəsi olan və terror aktları hazırlayan 7 şübhəlini həbs edib". 

"Operativ Media" xəbər verir ki, bu barədə İsrailin baş naziri Binyamin Netanyahunun ofisinin Mossad kəşfiyyat xidməti və Baş Təhlükəsizlik Xidməti (Şin Bet) adından yaydığı bəyanatda deyilir.

"Danimarka təhlükəsizlik və hüquq-mühafizə orqanları sürətli və hərtərəfli araşdırmadan sonra HƏMAS terror təşkilatı adından hərəkət edən 7 terrorçunu həbs edib və Avropa torpaqlarında günahsız mülki insanların öldürülməsinə yönəlmiş hücumun qarşısını alıblar", - deyə məlumatda bildirilir.

İsrailin təhlükəsizlik qüvvələri Danimarka nümayəndələrinə HƏMAS-ın Avropaya nüfuz etməsinin ifşası ilə yekunlaşan uğurlu əks-terror əməliyyatına görə təşəkkür edib.