Aİ İsrail və Fələstin arasında sülh çağırışı ilə bağlı razılığa gələ bilməyib

Avropa İttifaqı (Aİ) ölkələri icma sammitinin ikinci günündən sonra İsrail və Fələstin arasındakı münaqişə barədə veriləcək bəyanatla bağlı razılığa gələ bilməyiblər.

"Operativ Media" xəbər verir ki, Brüsseldə yayılan sammitin 10 səhifəlik yekun bəyanatında Yaxın Şərqlə bağlı sadəcə bir cümlə yer alıb.

"Avropa Şurası Yaxın Şərqlə bağlı dərin strateji müzakirə apardı", - bəyanatda qeyd edilib.

Münaqişədən ötən iki aydan artıqdır ki, bir çox Aİ ölkəsinin çağırışlarına baxmayaraq, 27 üzv dövlət Qəzzada atəşkəs tələb edəcək ümumi mövqedə razılığa gələ bilməyib.

Belçikanın Baş naziri Alexander De Croo sammitin ikinci plenar iclası başlamazdan əvvəl bildirib ki, əgər avropalılar bu münaqişənin həllində rol oynamaq istəyirlərsə, öncə ortaq mövqeyə gəlmək lazımdır.