Politico: ABŞ və Avropa Ukrayna ilə bağlı strategiyasını mümkün danışıqlara doğru dəyişir

"ABŞ və Avropa rəsmiləri Ukrayna məsələsində diqqətlərini tədricən fərqli yönə, Ukraynanın Rusiyaya qalib gəlmək ehtimalından münaqişəyə son qoymaq üçün potensial danışıqlarda mövqeyini yaxşılaşdırmağa yönəldirlər". 

"Operativ Media" xəbər verir ki, bu barədə "Politico" qəzeti öz mənbələrinə istinadən məlumat yayıb.

Məlumata görə, Vaşinqton və onun avropalı müttəfiqləri Ukrayna ilə bağlı strategiyalarını "sakit şəkildə dəyişirlər" və uğursuz əks-hücumdan sonra ölkənin şərqində müdafiə mövqeyinə keçidi müzakirə edirlər. Nəşr hesab edir ki, bu cür danışıqlar çox güman Ukraynanın bir hissəsinin Rusiyaya verilməsi demək olacaq.

Bundan əlavə, məqalədə qeyd olunur ki, hava hücumundan müdafiə sistemlərinin gücləndirilməsi və Ukraynanın Belarusla şimal sərhədi boyunca istehkamların, tank əleyhinə maneələrin və səngərlərin tikintisi müzakirə olunur. Vaşinqton administrasiyası Ukrayna hərbi-sənaye kompleksini mümkün qədər tez bərpa etmək niyyətindədir ki, Kiyev lazımi silahları özü istehsal edə bilsin.