Misir prezidenti Qəzzada barışığı ölkəsi üçün prioritet adlandırıb

"Hazırda Misir tərəfinin prioriteti Qəzza zolağında atəşkəs və anklavın mülki əhalisinin qorunmasıdır". 

"Operativ Media" xəbər verir ki, bu sözləri Ərəb Respublikasının prezidenti Əbdülfəttah əs-Sisi amerikalı konqresmenlərlə görüşü zamanı deyib.

"Prezident müstəqil Fələstin dövlətinin yaradılması yolu ilə Fələstin probleminin ədalətli və hərtərəfli həlli istiqamətində ciddi çalışmağın vacibliyini vurğulayıb. O həmçinin qeyd edib ki, Misirin hazırkı prioriteti atəşkəsə nail olmaq, mülki insanları qorumaq və onlara humanitar yardım çatdırmaqdır. Qəzzanın yaşadığı humanitar fəlakətin öhdəsindən gəlmək üçün kifayət qədər dəstək lazımdır", - Misir prezidentinin rəsmi nümayəndəsi Əhməd Fəhmi "Facebook" səhifəsində bildirib. 

Onun sözlərinə görə, əs-Sisi vurğulayıb ki, Misir Fələstin probleminin fələstinlilərin onlara məxsus olan ərazilərdən məcburi köçürülməsi yolu ilə aradan qaldırılması cəhdlərini qəti şəkildə qəbul etmir.