Şolts: Digər Aİ ölkələrinin Kiyevə yardımı qeyri-kafidir

"Almaniyanın Avropa İttifaqı (Aİ) tərəfdaşları Kiyevi daha fəal dəstəkləməlidir; vəd edilən hərbi yardımın həcmi hazırda kifayət deyil. Almaniya təkbaşına Ukraynaya dəstək verə bilməyəcək".

"Operativ Media" xəbər verir ki, bunu Berlində Almaniya kansleri Olaf Şolts Lüksemburqun baş naziri Lyuk Fridenlə danışıqlardan sonra deyib.

"Almaniyanın töhfəsi nə qədər əhəmiyyətli olsa da, Ukraynanın uzunmüddətli təhlükəsizliyini təmin etmək üçün tək bu kifayət etməyəcək. Mən Avropa İttifaqını Ukrayna üçün səylərini gücləndirməyə çağırıram. İndiyədək əksər üzv ölkələrdən Ukraynaya silah tədarükü planlaşdırılıb. Fevralın 1-də keçiriləcək Aİ sammitinə qədər biz avropalı tərəfdaşlarımızın bu il Ukraynanı dəstəkləmək üçün hansı konkret töhfə verəcəyinə dair mümkün qədər dəqiq icmal hazırlamalıyıq", - Almaniya Nazirlər Kabinetinin rəhbəri bildirib.

O əlavə edib ki, Berlin əvvəlki kimi Kiyevi dəstəkləməyə davam etmək niyyətindədir. Şolts deyib ki, onun hökuməti Ukraynaya daha sürətli və daha böyük silah tədarükünə nail olmaq üçün sənaye nümayəndələri ilə gündəlik əlaqə saxlayır.

Qeyd edək ki, 2022-ci ilin fevralından Ukraynaya Almaniyadan humanitar, maliyyə və hərbi yardımın ümumi həcmi 25 milyard avronu keçib. Ötən ilin noyabrında Almaniya hökumətinin 2024-cü ildə yardımı 4 milyard avrodan 8 milyard avroya çatdırmaq niyyətində olduğu bildirilmişdi.