Ağ Ev: Qərb Ukrayna ordusu üçün təlimlərin əhatə dairəsini genişləndirir

ABŞ-nin rəhbərlik etdiyi Qərb koalisiyası Ukrayna Silahlı Qüvvələrinin təlimlərinin əhatə dairəsini genişləndirir. 

"Operativ Media" xəbər verir ki, bunu Davosda keçirilən Dünya İqtisadi Forumunda çıxışı zamanı ABŞ prezidentinin milli təhlükəsizlik üzrə köməkçisi Ceyk Sullivan deyib.

"Birləşmiş Ştatlar və tərəfdaşlarımız Ukraynanı dəstəkləməyə davam edəcək. Biz Ukrayna qoşunlarının təlimlərinin əhatə dairəsini genişləndiririk. Ukraynanı lazımi təchizatla təmin etmək üçün lazımi resursların ayrılması üçün ikitərəfli dəstəyi təmin etməyə çalışırıq. Biz öz hərbi-sənaye bazamızı qururuq. Rusiyanın eyni şeyi etmək üçün ehtiyac duyduğu kritik resurslara çıxışını isə əngəlləyirik", - Sullivan qeyd edib.

Onun sözlərinə görə, Qərb Ukraynada "innovasiya" ilə məşğuldur: "Bu, çox vacib məqamdır. Biz tərəfdaşlarımız və xüsusilə özəl sektorla Ukraynaya dəyişən döyüş mühitində elektron müharibə, pilotsuz təyyarələr və minalardan təmizləmə kimi əsas texnoloji problemləri həll etməkdə kömək etmək üçün işləyirik".