Böyük Britaniyanın xarici işlər naziri Folklend adalarına səfər edəcək
Böyük Britaniyanın xarici işlər naziri Devid Kemeron Amerika qitəsinə səfərinə başlamazdan əvvəl yaxın günlərdə Folklend adalarına (Malvin adalarına) səfər edəcək.
"Operativ Media" xəbər verir ki, bu barədə Böyük Britaniya Xarici İşlər Nazirliyinin yaydığı məlumatda deyilir.
"Folklend adaları Britaniya ailəsinin dəyərli bir hissəsidir və biz başa düşürük ki, onlar bu ailənin bir hissəsi olaraq qalmaq istədikcə, onların suverenliyi müzakirə oluna bilməz", - nazir səfərdən əvvəl bildirib.
Orada o, yerli hakimiyyət orqanları ilə görüşəcək və Folklend müharibəsi zamanı həlak olmuş britaniyalı hərbçilərin xatirəsini yad edəcək.
Kemeronun proqramına Braziliyaya səfərləri də daxildir. Nazir fevralın 21-22-də Rio-de-Janeyroda G20 ölkələrinin diplomatik departament rəhbərlərinin görüşündə iştirak edəcək, Paraqvay və ABŞ-yə səfər edəcək.
Qeyd edək ki, Atlantik okeanının cənub-qərbində yerləşən Folklend adaları (Malvin adaları) 200 ildir ki, Argentina və Böyük Britaniya arasında ərazi mübahisəsinin predmeti olub. 1982-ci ilin aprelində ölkələr arasında silahlı qarşıdurma baş verib. Cənubi Amerika respublikası iki ay yarım davam edən döyüşlərdə 649 hərbi qulluqçusunu itirərək məğlub olub. Britaniya tərəfinin itkiləri 255 nəfər təşkil edib.
2013-cü ilin martında arxipelaq sakinlərinin böyük əksəriyyəti referendumda ərazinin krallığın mülkiyyətində qalmasına səs verib. Argentina plebisitin nəticələrini tanımayıb. Adaların öz nəzarətinə qaytarılması məsələsini ötən ilin sonlarında prezident Xavyer Miley qaldırıb. Seçki kampaniyası zamanı bunun hərbi yolla edilə bilməyəcəyini də bildirib.
