Lukaşenko Putinlə hərbi-siyasi məsələləri müzakirə edəcək

Belarus prezidenti Aleksandr Lukaşenko Rusiyaya səfəri zamanı təhlükəsizlik zəmanətləri haqqında sazişin hazırlanması çərçivəsində Rusiya lideri Vladimir Putinlə hərbi-siyasi məsələləri müzakirə etməyi planlaşdırır. 

"Operativ Media" xəbər verir ki, bu barədə jurnalistlərə Belarusun Rusiya Federasiyasındakı səfiri Dmitri Krutoy məlumat verib.

Daha əvvəl Belarusun xarici işlər naziri Sergey Aleynik bildirmişdi ki, Lukaşenko mayın 8-də Moskvada keçiriləcək Aİİ sammitindən sonra Qələbə Paradında iştirak etmək üçün Rusiya paytaxtında qalmağı planlaşdırır.

Səfirin sözlərinə görə, Belarus da Rusiyanın pilotsuz təyyarə proqramlarında daha sistemli və geniş miqyasda iştirak etmək istəyir: "Prezident bu yaxınlarda hava hücumundan müdafiə ilə bağlı ciddi bir tədbir keçirdi, ümumiyyətlə, Hava Hücumundan Müdafiə Qoşunlarının tərkibində əsas amillərdən biri olan pilotsuz uçuş aparatlarının istifadəsi belə mühüm amillə bağlıdır. Bu, bizim üçün vacibdir və biz bunu daha geniş miqyasda etmək, bu sahədə Rusiya proqramlarında daha sistemli şəkildə iştirak etmək istərdik".

Krutoy həmçinin qeyd edib ki, prezidentlər ticarət məsələlərini, eləcə də dövlət başçılarının diqqətini cəlb edən investisiya layihələrini müzakirə edə bilərlər: "Ona görə də danışılası bir çox şey var".

Fevral ayında Lukaşenko ölkənin təhlükəsizlik qüvvələrinin qarşısına pilotsuz uçuş aparatlarının inkişafı və təchiz edilməsi ilə bağlı tapşırıq qoyub.