ABŞ fikir ayrılıqlarına baxmayaraq İsraili dəstəkləyəcək

ABŞ fikir ayrılıqlarına baxmayaraq İsraili dəstəkləməyə hazırdır.

"Operativ Media" xəbər verir ki, bunu ABŞ prezidenti Co Bayden bildirib. 

Amerika lideri Vaşinqtondakı Holokost Muzeyində çıxışı zamanı deyib: "Mən yəhudi xalqının, İsrailin təhlükəsizliyinə və onun müstəqil yaşamaq hüququna, hətta aramızda olan fikir ayrılıqlarına baxmayaraq, tam sadiqəm". 

Eyni zamanda Bayden ölkə universitetlərində Fələstin tərəfdarı hərəkətləri tənqid edib: "Amerikanın heç bir şəhərciyində antisemitizm, nifrət və ya hər hansı zorakılıq təhdidləri üçün yer yoxdur. "Zorakı hücumlar və əmlaka ziyan vurmaq dinc etirazlar deyil. Bu, qanuna ziddir". 

Bundan əvvəl "The Wall Street Journal" qəzeti İsrail Müdafiə Qüvvələrinin (IDF) Qəzza zolağının Rəfah şəhərində HƏMAS-a qarşı genişmiqyaslı əməliyyatının mümkün başlaması ilə bağlı yaranmış vəziyyətin ABŞ və İsrail arasında ziddiyyətləri daha da dərinləşdirdiyini yazıb. Onun sözlərinə görə, Bayden administrasiyasının İsrailin Rəfaha hücumunun qarşısını almaq üçün aktiv ictimai və özəl kampaniyası onun Yaxın Şərqdəki müttəfiqi üçün ən çətin sınaq olub.