Ərəb Liqası İsrailin Livana hücumlarını pisləyib

Ərəb Liqası İsrail ordusunun Livana davam edən hücumlarını pisləyib.

"Operativ Media" xəbər verir ki, Ərəb Liqasının baş katibi Əhməd Əbu Qeytin imzaladığı bəyanatda İsrail döyüş təyyarələrinin Livanın cənubundakı Nəbatiyə bələdiyyəsinə endirdiyi hava zərbələrinə reaksiya verilib.

Açıqlamada, İsrailin hava hücumlarında aralarında Nəbatiyə Bələdiyyə Başçısı və humanitar yardım fəaliyyətləri həyata keçirən bəzi könüllülərin də olduğu bir çox adamın həyatını itirdiyi, İsrailin "vəhşiliyi" həyata keçirmək üçün ayrı-seçkilik etmədən hava hücumları ilə mülki əhalini və infrastrukturu hədəf aldığı ifadə edilib.

Təl-Əvivin Avropadan gələn tənqidlərə dözümlü olmadığına diqqət çəkən bəyanatda İsrail ordusunun Qəzza zolağında yaşayan Fələstinli mülki vətəndaşlara qarşı qırğınlarını artırmağa davam etdiyi vurğulanıb.

Hizbullaha yaxın olan “Əl-Əhbar” qəzeti İsrail döyüş təyyarələrinin şəhərdə hələ də fəaliyyət göstərən Nəbatiyə Bələdiyyəsini hədəf alan hücumunda bələdiyyə sədrinin öldüyünü açıqlayıb.