Son illərdə qadın futbolçulara cəmiyyətin yanaşması xeyli dəyişib.

Bunu "Operativ Media"ya müsahibəsində qadınlardan ibarət Azərbaycan milli komandasının üzvü Manə Mollayeva deyib.

O, futbola olan marağının necə yaranmasından danışıb.

 "Futbola olan marağımda əsas pay sahibi bibim oğlu idi. O, hər yay tətilində rayona gələndə özü ilə top gətirirdi və mən onunla həyətdə futbol oynayırdım. Bu sahədə məni ən çox dəstəkləyən isə anam olub".

Manə Mollayeva futboldakı çətinliklərə də toxunub.

"Ən böyük çətinliklər ciddi zədələr və legioner həyatı yaşadığım dövrdə yaxınlarımdan uzaq qalmaq idi".

Azərbaycan millisinin üzvü Macarıstanla səfər oyununun onun üçün unudulmaz oyunlardan biri olduğunu vurğulayıb.

"Unudulmaz oyunlar siyahımda bir neçə oyunu qeyd edə bilərəm. Onlardan biri də Macarıstanla səfərdə əldə etdiyimiz heç-heçə idi. Hesabda geri olduğumuza baxmayaraq, ikinci hissədə hesabı bərabərləşdirə bilmişdik. Nəzərə almaq lazımdır ki, Macarıstan yetərincə güclü komandadır".

Millimizin üzvü kitab oxumağı çox sevdiyini qeyd edib.

"Kitab oxumağı sevirəm. Bundan əlavə seriallara baxıram. Amma ən çox futbola baxmağı sevirəm".

Manə Mollayeva qadın futbolçulara cəmiyyətin yanaşmasının xeyli dəyişdiyinə inanır.

"Əlbəttə ki, son illərdə cəmiyyətin yanaşması xeyli dəyişib. Düşünürəm ki, bunun əsas səbəblərindən biri də son illərdə A milli komandanın verdiyi nəticələrdir".