Türkiyədən Azərbaycana səfərə gələn media nümayəndələri və qeyri-hökumət təşkilatlarının rəhbərlərindən ibarət nümayəndə heyəti Şəhidlər xiyabanını və Türk Şəhidliyi abidəsini ziyarət edib.

Operativ Media xəbər verir ki, səfər Türkiyə Azərbaycan Dostluq, Əməkdaşlıq və Həmrəylik Vəqfi (TADİV) və Kültürlerarası Ağ Dərnəyinin birgə təşkilatçılığı ilə həyata keçirilən “Sülhün coğrafiyası: Qarabağ – Cənubi Qafqazda quruculuq, sabitlik və regional əməkdaşlıq” proqramı çərçivəsində baş tutub.

Nümayəndə heyəti əvvəlcə Azərbaycanın müstəqilliyi, suverenliyi və ərazi bütövlüyü uğrunda canlarını qurban vermiş şəhidlərin uyuduğu Şəhidlər xiyabanını ziyarət edib, məzarları önünə gül dəstələri qoyub.

Daha sonra qonaqlar Türk Şəhidliyi abidəsini ziyarət edərək Bakının bolşevik-daşnak qüvvələrinin işğalından azad olunması və Azərbaycanın ərazi bütövlüyü uğrunda şəhid olmuş türk və azərbaycanlı əsgərlərin xatirəsini ehtiramla yad ediblər.