Macarıstan XİN rəhbəri Ukraynada və Yaxın Şərqdə sülhün necə bərqərar olunmasından danışıb

"Ukrayna və Qəzzadakı münaqişələrin həlli fərqli yanaşmalar tələb edir"

"Operativ Media" xəbər verir ki, bunu Macarıstanın xarici işlər naziri Peter Siyyarto deyib.

"Avropa Ukrayna münaqişəsinə yanaşmada böyük səhvlərə yol verib. Xüsusilə, onu təcrid etməkdənsə, qloballaşdırıb. Aİ sülhə doğru addımlardan vaz keçib və indi gördüyü tədbirlər “eskalasiya təhlükəsi ilə üz-üzədir. Müharibə nə qədər uzun sürərsə, bir o qədər çox insan öləcək", - deyə o bildirib.

Nazir qeyd edib ki, indi əsas məsələ insanların həyatını xilas etmək və Ukraynanı bir ölkə kimi  tam dağılmadan xilas etməkdir.

Siyyarto əmindir ki, Ukrayna böhranının həlli üçün hərəkətlərin ardıcıllığı belə olmalıdır: atəşkəs, sülh danışıqları və sonra sülh sazişi.

Eyni zamanda Qəzza zolağındakı vəziyyətlə bağlı Siyyarto hesab edir ki, terrorçular gələcəkdə insanları öldürməsin deyə Həması məğlub etmək lazımdır:

"Hər iki halda Macarıstan gərginlik istəmir və başa düşür ki, bu iki münaqişədən hər hansı biri digər ölkələrin iştirakını tələb edib dünya müharibəsinə çevrilə bilər. Macarıstan Kiyevə silah verməyən azsaylı Avropa ölkələrindən biridir. O, Rusiya ilə münasibətləri qoruyub və atəşkəsə çağırıb".