Yəmən hökuməti: Husilərin hücumları ərzaq və dərman tədarükünü təhlükə altına qoyur

Yəmən hökuməti xəbərdarlıq edib ki, İranın dəstəklədiyi Husilər hərəkatının Qırmızı dənizdəki hücumları əsas ərzaq məhsulları və dərman təchizatında ciddi təhlükələrdən xəbər verir.

"Operativ Media" xəbər verir ki, bu barədə Yəmənin SABA xəbər agentliyi məlumat yayıb.

Məlumata görə, hökumət Baş nazir Moin Əbdülməlikin sədrliyi ilə onlayn iclas keçirib.

Yerli və regional hadisələrin müzakirə edildiyi toplantıda Husilərin beynəlxalq gəmiçilik xətlərinə və ticarət gəmilərinə hücumlarının nəticələri qiymətləndirilib.

İclasda Husilərin əsas mallar, qida və dərman idxalında ciddi təhlükə yaradacaq hücumlarının əks-sədalarının qarşısının alınması üçün müvafiq orqanlar arasında koordinasiya mexanizminin yaradılması istiqamətində səylərin davam etdirildiyi bildirilib.

İclasda qeyd olunub ki, bu kontekstdə atılacaq addımların əlaqələndirilməsi, lazımi planların hazırlanması və icra prosesinin izlənilməsi məqsədilə bütün nazirliklərin və aidiyyəti qurumların nümayəndələrindən ibarət böhranla mübarizə komitəsinin yaradılması qərara alınıb.